Գարնան հրաւէրը🌷

Ձմրան վերջն էր: Օր մը արեւը բարձրացաւ վեր ու աւելի ջերմ շողաց: Արեւին ժպիտովն ալ ծնաւ գարունը:
—Ծառե~ր, ծաղիկնե՜ր, խոտե՜ր ու բոյսե՜ր, արթնցէ՜ք, արթնցէ՜ք, այս ինչքան քնացաք,- ըսաւ գարունը: Ես արդէն եկած եմ արթնցէ՜ք ու երկիրը զարդարեցէք կանաչով:
—Բարե՜ւ, քեզ, բարե՜ւ, սիրելի գարուն,- ըսին խոտերը եւ կանաչ դարձան:
—Բարե՜ւ, Բարե՜ւ,- ըսին ծաղիկներն ու ծառերը եւ սկսան աճիլ ու ծաղկիլ:
—Օ՜, այս ի՜նչ լաւ է, որ եկար, սիրելի՛ գարուն, մենք թմրած էինք,- ըսին մեղուները եւ տզտզալով դուրս ելան իրենց փեթակներէն:
Դուրսը տաք էր: Թռչունները կ’երգէին: Մարդիկ կ’աշխատէին դաշտերուն եւ այգիներուն մէջ: Ամէն տեղ ծաղիկ էր ու կանաչ:
Մեղուները թռան մօտակայ խնձորենիի մօտ եւ խնդրեցին.
—Խնձորենի՜, ծաղիկներդ բա՜ց, որ հիւթդ քաղենք. մենք կարօտցած ենք ծաղիկներուն:
—Ափսո՜ս, շա՜տ ափսոս, որ իմ ծաղկելու ժամանակը չէ, գացէք բալենիին քով:
Մեղուները թռան դէպի բալենին:
—Բարո՜վ եկաք, ժի՛ր մեղուներ սիրունիկնե՛ր,- ըսաւ բալենին,- բայց իմ ծաղիկները դեռ քնացած են, վաղը եկէք:
Միւս կողմէն մեղուներուն կանչեց նշենին, որ իր վարդագոյն ծաղիկները արդէն բացած էր եւ լեցուած էր քաղցր հիւթով:
Մեղուները ուրախ ուրախ թռան դէպի նշենին:

Բառեր
Շողալ.- փայլիլ,  ճառագայթել
Տզտզալ, տզզիւն.- բզզիւն (ճանճի, մեղուի, մժեղի)
Փեթակ.- մեղուատուն
Այգի.- խաղողի կամ ընդհանրապէս պտղատու ծառեր տնկելու տեղ
Բալ.- կեռասին թթուաշ (թթու) տեսակը, ծառը ՝բալենի
Նշենի.- նուշի ծառ
Հիւթ.- պտուղներէ քամուած հեղուկ
Ժիր.- աշխոյժ, աշխատասէր

Հարցումներ
1. Տարուան ո՞ր ամիսը մենք կը հրաւիրենք Գարունը, եւ որ եղանակին վերջաւորութեան:
Ձմրան վերջաւորութեան, մարտ ամսին մենք կը հրաւիրենք գարունը։
2. Ինչո՞ւ համար եկաւ գարունը, ի՞նչ նպատակով:
Գարունը եկաւ, որ Ծառերը, ծաղիկները, խոտերը ու բոյսերը արթնանան։
3. Ի՞նչ եղան խոտերը, ծաղիկներն ու ծառերը երբ գարունը տեսան:
Ծառերն, ծաղիկներն, խոտերն ու բոյսերն արթնացան։
4. Երբ տեսան գարունը Մեղուները ուրախացա՞ն, ի՞նչ ըրին:
Այո, մեղուները ուրախացան երբ տեսան գարունը, նրանք թռան մօտակայ խնձորենիի մօտ։
5. Մեղուները ի՞նչ խնդրեցին խնձորենիէն:
Մեղուները խնձորենուն խնդրեցին որ, նա ծաղիկները բացի, որպեսզի հիւթը քաղեն։ Նրանք կարօտցած էին ծաղիկներուն:
6. Վերջաւորութեան ո՞վ հրաւիրեց մեղուներուն եւ մեղուները ինչո՞ւ ուրախ էին:
Վերջաւորութեան մեղուներուն կանչեց նշենին, որովհետև իր վարդագոյն ծաղիկները արդէն բացած էր եւ լեցուած էր քաղցր հիւթով: